Foto Kegiatan

Sejarah

RIWAYAT  SINGKET/SAJARAH

 HAJAT CAI NGARUAT LEMBUR

Kampung Parakan salam jalan Anda Sutisna RW 08

Desa Nyalindung Kecamatan Cipatat

Kabupaten Bandung Barat

A.     Riwayat/Sajarah.

       Puji  sinareng syukur urang sanggakeun ka zdat gusti alloh nu maha suci, rehna dina ieu tetekon wanci nu mustari, seja  medar riwayat / sajarah  upacara ritual budaya masarakat kampung parakan salam desa nyalindung dina  laraga “ hajat cai ngaruat lembur.” anu dipieling dina raraga milangkala tepung taun ping 21 juni.

        Diawitan ku tarekah dinas kabudayaan sareng pariwisata kabupaten bandung barat, ngalangkungan widang kebudayaan, parantos ngayakeun revitalisasi seni, adat sareng budaya, parantos  ngangkat miwah ngahirupkeun deui kabiasan tradisi masarakat mangrupi upacara adat ritual budaya hajat cai ngaruat lembur.    Tumut kana narasumber abah amat, yen  pang ahirna aya hajat cai ngaruat lembur dina taun 1950. kabiasaan upacara ieu diayakeun,  nyoko kana sumber cai anu dikaramatkeun ku masarakat kampung parakan salam.    

        ku ayana ide sareng gagasan masarakat kalayan di jeujeuran ku abah amat salaku pamangku adat sareng bapa ujang sutisna salaku tokoh masarakat, alhamdulillah ieu upacara ritual budaya tiasa pinton dihirupkeun deui dina taun 2011.  hakekat tradisi budaya ieu nyandak kana nilai-nilai panghormatan sareng  panghargaan  ka para tokoh anu  dikaramatkeun di kampung parakan salam sapertos mbah daha,  eyang entang, ibu entang,  ibu ayu asih, uyut idris, ambu ucu,  eyang arsan,  ema memeh, aki amir, aki sukri, aki edeng,  aki indi, aki anda sutisna, aki basari sareng para sesepuh nu sanesna. kujasana anjeuna tempat benda budaya masarakat mangrupi sumber cai atanapi pancuran  tiasa disalametkeun kalayan dipiara janten sumber cai karamat di kampung parakan salam, nu aya dilamping walungan cikubang  nyaeta  :

kahiji                : cikahuripan,

kadua               : ciasihan,

katilu                : cikarahayuan,

kaopat              : cikalanggengan,

kalima               : cikamulyaan,

kagenap           : cikadugalan

katujuh             : cikawangian.

              Tuhu kana riwayat  sajarah tradisi budaya karuhuan ieu,  alhamdulillah tiasa nyandak kaberkahan nyaeta nanjeurna karahayuan masyarakat mangrupi  cageur, bageur, waras, rahayu,  waluya, khususna pikeun masarakat kampung parakan salam, umumna Desa Nyalindung, utamina dina ngaheuyeuk ieu lembur ku sifat silih asih, silih asuh, silih heman sangkan kaluhur sirungan kahandap akaran ngawujud karya nu  bleg tambleg sabeulegedeg.   

B.    Ritual Adat Budaya.

         Salajengna supados kauninga, reh upacara hajat cai ngaruat lembur anu tos dilaksanakeun dikampung parakansalam diantawisna : 

1.    Hajat cai ngaruat lembur anu kahiji, kaping  20 juni 2011  di pupuhuan ku abah amat salaku sesepuh adat. ngadegkeun amanat karuhun parakansalam dina judul ” napak dawuh karuhun, ngadegna  hirup-hurip  talari parantina baheula”.

2.    Hajat cai ngaruat lembur anu kadua, kaping 27 mei 2012  di pupuhuan ku abah amat tokoh adat sareng ku bapa ujang sutisna anjeuna salaku ketua rw 08 ketua lingkung seni garuda naga (garna). nyandak judul “ putu sewu ngahirupkeun karya karuhun sangkan anak incu hurip waras di lembur parakan salam.”

3.    Hajat cai ngaruat lembur anu katilu, kaping 6 juni 2013  di pupuhuan ku abah  karyama anjeuna salaku ketua lingkung seni mandura harja nyandak judul “ banyu karamat nyipuh anak incu parakan salam ku tempur cai”

4.    Hajat cai ngaruat lembur anu kaopat, kaping 15 juni 2014   di pupuhuan ku bapa karyana anjeuna salaku ketua padepokan tapak sakti janggawareng. nyandak judul “ putu sewu sugih mukti  cukang lantaran napakeun ajaran karuhunna.”

5.     Hajat cai ngaruat lembur anu kalima, kaping 14 juni 2015  di pupuhuan ku padepokan tapak sakti janggawareng, nyandak  judul “. mulangkeun panineungan  arulina bebenyit  dina mangsa  lampah alam katukang”.  mangrupi  pintonan lomba kaulinan barudak tingkat desa nyalindung.

        Sakantenan dina hajat cai ngaruat lembur anu kalima. Ditembrakeunan wanci katetepan mangrupi hiji katangtosan, wireh tumut kana  amanat abah amat salaku  sesepuh adat/kampung, kalayan dirojong  hasil  sawala sareng tokoh masyarakat.  ayeuna kami diputuskeun rehna  “ kaping 21 juni mangrupi. poe mielingna hajat cai ngaruat lembur kampung parakansalam. “kalayan nyandak dasar kana hiji  tulisan  wangsit karuhun parakan salam nyaeta janggawareng ayah katmah  atanapi mama idris nu diserat dina  prasasti, titimangsa,  ahad kaliwon, 27 jumadil ahir 1430, hidjriyah, minggon, ping 21 juni 2009. anu unina ;  wengkuh cindek andalemi anak incu bubuara pancen  amanat ti gusti alloh wedalan teureuh nyalindung gelarna kamus alam  nyangking garba, rasa, tahta hirup-hurip dunya ahiroh.   anu hartosna;  parantos waktuna saeutik-saeutik anak incu ngolah daerah  nyepeng amanat ti gusti alloh, nu asalna  turunan nyalindung, bisa  popolah nerjemahkeun alam ku kasucian wujud,  rasa jeung kadudukanna bisa mawa kahirupan nu hurip di dunya jeung aherat)

          Parantos  kauningan kusadayana masarakat Desa Nyalindung, ku tarekah dinas kebudayaan dan pariwisata Kabupaten Bandung Barat dina bimbingan teknis kebudayaan  kabupaten-kota  Sa-Jawa Barat, kaping tanggal 25 maret 2015  nu diayakeun  ku dinas pariwisata dan kebudayan provinsi jawa barat, parantos ditetepkeun rehna “ ritual budaya hajat cai ngaruat lembur di kampung parakan salam parantos  dicatet ku kementerian pendidikan dan kebudayaan republik indonesia, kalebet kana bentuk warisan budaya tak benda.

C.   Panutup.

          Ku ayana kaputusan tadi, ieu mangrupi  hiji kabingahan pikeun masyarakat desa nyalindung,  margi bapa kapala desa, maparin putusan di Surat Keputusan Kepala Desa Nyalindung Kecamatan Cipatat Kabupaten Bandung Barat  tiasa netepkeun ritual budaya poe hajat cai ngaruat lembur, kaping 21 juni, sareng ieu ritual budaya  tiasa janten icon  atanapi ciri khasnya  Desa Nyalindung. Sakitu riwayat anu kapihatur,   rampung dawuh tutas pangandika, wabilahit taufik wal hidayah;  wasalamu a’laikum warohmatulohiwabarokatuh.

(wassalam Hernandi Tismara).